Regidoria de Cultura

Era celebracion deth Dia Internacionau dera Lengua Mairau, qu’organize era Bibliotèca Manuel Pérez Bonfill de Campredó, se debanèc enguan eth dissabte 19 de hereuèr en diferenti espacis dera poblacion. Er occitan de Catalonha qu’ère era cultura en aumenatge en aguesta escadença. S'organizèc ua jornada fòrça completa entà reivindicar er usatge der aranés pertot: en casa, ena escòla e en internet. Se preparèren activitats pendent tot eth dia restacades damb eth païsatge rurau, era gastronomia aranesa, es dances tradicionaus occitanes e era inauguracion d’ua exposcion sus es usatges sociaus der aranés, ja en aguest sègle XXI.

En maitin se realizèc ua caminada enquiara beròia barraca dera familha Cugat, tota ua òbra d’art de pèira sèca. Pendent era caminada se hègen públics es nòms d’ua trentia d’objèctes agricòles, arbes e plantes en aranés, que se difonien enes diuèrsi hilats sociaus der ajuntament.

Posteriorament, en restaurant locau Can Joan se premanic un dinar damb òlha aranesa coma plat notable.

Ja pera tarde, en espaci culturau La C, se celebrèc un talhèr de dances occitanes, que compdèc damb ua nombrosa preséncia de dançaires que gaudiren d’ua session vertadièrament extraordinària.

Fin finau, s'inaugurèc era didactica exposicion «Aranés, er occitan de Catalonha», a on se hè ua revision ara situacion sociopolitica dera lengua mairau en Aran, atau coma hè un balanç sus es perspectives de futur.

Eth govèrn de Campredó se comprometec ena aqduisicion de libres en aranés entà collaborar ena sua promocion. Que realizèren autanplan era mitat deth parlament introductòri en aranés, atau coma se demanèc qu’es explicacions dera exposicion siguessen egalament en lengua occitana. Tanben se repartic un huelheton explicatiu deth contengut dera exposicion qu’includís ua seguida d’expressions en aranés que pòden èster usades pes toristes.

Pendent era rèsta de dies de hereuèr se publicaràn enes hilats sociaus municipaus bères informacions d’interès arrevirades en aranés.